يوميات قلب مجروح(قصة حقيقية)......... جامدة اوى

الفصل الحادى والعشرون:-

يصحى حازم تانى يوم ويلاقى مكالمات كتيرة من مريم ويتصل بيها و بعد كلام كتير وانها مش مغرورة ولا زى ما هو قال عنها وانه شافها مع ولاد كتير وعكس الكلام اللى بتقوله على نفسها سالها حازم....اوكى يا مريم انا هسالك سوال واحد...ايه هو...انتى عايزة تبقى علاقتنا ايه بالظبط مع بعض...والله مش عارفة انا مقولتش اه ومقولتش لا...اه ولا فى ايه بقى بالظبط...انت عارف...لا انا معرفش حاجة يا مريم وهتفضلى كدة عايزة تلمى اكبر قدر من اللى دايبين فيكى جانبك كدة بترتاحى نفسيا...

يعنى انا مريضة ....ممكن اللى شوفته منك بيقول انك فعلا ممكن تكونى مريضة وعلاجك ان ولاد كتير تقولك بحبك ويفضلو حواليكى زى ما قولتلك كدة بيريح نفسيتك واحب اقولك انى مش واحد منهم انا اساسا نسيت موضوعك دة خلاص وانا مش ناقصه بعدين بصراحة...هو لسه فى صراحة...اه لسه مش شايف فيكى حاجة مختلفة تستاهل غرورك او انى حد يجرى وراكى او انك تلمى ناس حواليكى مش عارف على ايه يمكن عشان انتى عارفة انك مفكيش حاجة تشد اى حد فا دة سبب اللى بتعمليه...ممكن تحترم نفسك...انا محترم غصب عنك انتى فاهمة...انت بتزعق كدة ليه...بقولك ايه خلاص كدة كفاية اوى بقى ماشى استحملتك كتير وعشان نرتاح انا وانتى انا ننسى اننا عرفنا بعض سلام...

وكمل حازم اللى فاضل فى اجازته وطبعا حكى لنها على كل اللى حصل مع مريم وكان بيشهدها هى عملت ايه وانه مقدرش يستحمل غرورها وكدبها اكتر من كدة والموضوع بالنسبه له اساسا كان وقت ولا فى باله....
ايدا يا حازم انت عملت فيها ايه وقولتلها ايه...اللى حكيتهولك يا نها ما انتى عارفه مبحبش حد يعيش عليا ويحور كمان وفكرانى انى اهبل بقى وبتاع...حازم انت كسرتها من جوة بجد وهديت غرورها بكلامك دة انا اكتر واحدة فاهمة مريم والله زمانها متبهدلة من جواها...تتبهدل بقى عشان تتعلم ما تعيش على حد تانى ولو انى اشك انها تتعلم...حازم انت عارف اساسا اللى كان يبصلها بصة وحشة بتبهدله وتقول بابى وهجيبلك مش عارفة مين عشان كدة محدش بيحبها واللى بيكلمها بينافقها(بابا مريم كان حتة تقيلة فى اسماعيلية مفيش داعى طبعا نعرف مين)...كويس عرفت انا عقدة النقص دى منين يلا سيبك المهم انتى خدى بالك بقى من نفسك.....الاجازة خلصت بسرعة يا حازم...اه اصل كانت كلها احداث مثيرة...لا مليش دعوة بقى سيبك من شرم دى...مقدرش اصل انا نفسى اسيبنى منها فعلا بس هى مش هتسيبنى دة ممكن تيجى بنفسها ليا لحد سريرى...يا سلام بتحبها اوى كدة...

مش حب دة قدر بعيد عنك يعنى وعن السامعين...ماشى يا حازم وانت كمان خد بالك من نفسك اوكى...ماشى ان شاء الله يلا سلام عشان همشى الصبح بدرى بقى....سلام

يرجع حازم جيشه وفى خدمة من الخدمات بتاعت بالليل تجيله مكالمة زى ما هو متعود ....يا ترى مين المرة دى...الو...ايوة مين معايا...انا مريم...اه ازيك يا مريم اخبارك ايه...كويسة...ينفع تدخل على النت...لا والله ما ينفعش يا مريم انا فى شرم دلوقتى ومش هقدر ادخل...هو انت سافرت...اه سافرت امبارح الصبح...طيب ماشى خلاص...خير كان فى ايه...مفيش كنت عايزة اقولك انى بردو مش زى ما افتكرت عنى...بعد اذنك يا مريم الموضوع دة بلاش منه تانى ونسيته خلاص و ما تزعليش منى لو قولتلك حاجة زعلتك...لا مش زعلانة خلاص...بصى لو تحبى احنا ممكن نفضل اصدقاء واصدقاء كويسين اوى كمان...اه اوكى خلاص انا موافقة ...بس بقولك لا فى غرور ولا تكبر ولا كلام باسلوب وحش وكدة عايزة تفضلى كدة يبقى مع كله الا انا...ماشى اوكى انا موافقة ...خلاص ماشى اتفقنا...اتفقنا...

وتخلص المكالمة وتيجى بعدها لحازم مكالمات كتيرة زى ما هو متعود طبعا لحد ما يتصل بيه رقم غريب تانى وافتكرها مريم تانى...ايوة يا مريم...مريم مين انت عرفت مريم؟؟؟ مين معايا...اكيد نسيت صوتى احنا من اكتر من سنة ونص خلاص ما اتكلمناش...معلش مش واخد بالى مين...فكر...لا معلش مش بقدر افكر دلوقتى بتعب ممكن الصبح بقى سلام...استنى انت بقيت قاسى اوى مش فاكر صوتى يا حازم...يعنى حاسس انى سمعته قبل كدة...انا نيرمين يا حازم فاكرنى...نيرمين يااااه اه فاكرك طبعا...اخبارك ايه...

يعنى كويسة الحمد لله...عاملة ايه وعملتى ايه طمنينى...تمام ومعملتش حاجة سيبت الموضوع كدة وفى مرة صاحبتى خدتنى لدكتورة وقالتلى انى الحمد لله مفيش اى حاجة ونسيت الموضوع دة بقى خلاص...طيب كويس اوى الحمد لله انا دى كانت الحاجة الوحيدة اللى قلقانى عليكى...كنت قلقان عليا كويس والله دة انت مفكرتش حتى تسال عليا زى ما وعدتنى اخر مرة كلمتك فيها...نيرمين انتى كنتى متوقعة ايه يعنى لما تفاجينى بمفاجاة زى اللى قولتهالى دى ساعتها...ماشى انا مش عايزة افتكر الكلام دة خلاص...ولا انا بس انتى ايه فكرك بيا...وحشتنى وحبيت اسمع صوتك...واشمعنى دلوقتى...والله انت واحشنى من زمان بس كنت خايفة اكلمك عشان ممكن ما تردش او تحرجنى...وادينى رديت عليكى اهو وبنتكلم...

وحشتنى اوى يا حازم بجد انا طول الفترة اللى فاتت وانا اقول اكلم لا بلاش لحد النهاردة بقى مقدرتش اصلى افتكرت ايام اول مرة اتقابلنا واتعرفنا ازاى والكلام دة كله...اه كانت ايام جميلة والله الايام دى...اوى يا حازم وانت اخبارك ايه فينك دلوقتى...والله يا نيرمين انا فى الجيش ...اه صح سورى نسيت انت دخلت صح يا حرام وبتنزل اجازات...اه الحمد لله بنزل كل 20 يوم 10 ايام وخميس وجمعة...طب الحمد لله كويس اوى وفاضلك فيه اد ايه يعنى قربت اخلص فاضلى حوالى 3 شهور كدة ان شاء الله...كويس اوى يعدوا على خير ان شاء الله...وانتى فينك...مفيش انا بقى دخلت كلية حقوق وطبعا مش فاهمة فيها اى حاجة فى اى حاجة...ايدا يا نيرمين انتى لسه بردو مبتفهميش انا قولت اتعالجتى...

هههههههه لا دة ملوش علاج وبعدين انت لسه خفيف...اهو بحاول احاحفظ على نفسى...انا مبسوطة اوى انى كلمتك تانى يا حازم...وانا كمان والله يا نيرمين...طيب ايه...ايه ايه.....ممكن نرجع اصدقاء بس اكيد احلى اصدقاء...اكيد يا نيرمين ممكن طبعا...ميرسى اوى يا حازم انا هكلمك بقى على طول اوكى...اوكى يا نيرمين يلا سلام...سلام...

طبعا حازم مكنش متوقع المكالمة دى خالص وادى حكاية من الماضى رجعتله تانى ولكن حازم من جواه كان فعلا خلاص مبقاش بيحس ناحية اى بنت باى احساس ولا حب ولا غيره مجرد وقت وبيضيع معاهم حتى نيرمين اللى حبها اوى من قلبه الا انه فعلا بردو مفرقتش معاه اى حاجة المكالمة غير انها زيها دلوقتى زى اى بنت بيكلمها بيضيع وقت مش اكتر...

وتفضل المكالمات مع نيرمين طول فترة الجيش وعلى فترات كدة مكالمة من مريم والحياة ماشية تمام كدة مع حازم وخلاص فاضل ايام ويخلص جيشه ويرجع لحياة الحرية من تانى ويكون خلص من اغرب سنة واجرب تجربة فى حياته عدت عليه وهى الجيش طبعا لانه مهما حد حكى عن اللى كان بيحصله ايه فى الجيش محدش هيقدر يفهمه الا اللى دخله زيه..

وينزل حازم اجازة كبيرة وخلاص هيرجع على اخر يوم لتسليم المخلة وياخد شهادة الجيش وينطلق بقى من تانى ونشوف ان شاء الله المرة الجاية هيحصل ايه مع حازم بعد الاجازة وبعد ما يخلص جيشه

الفصل الثانى والعشرون:-

ينزل حازم اجازته الاخيرة فى الجيش وكان فرحان اوى اوى وكأن واحد كان على قلبه هم كبير وما صدق انه انزاح من عليه عشان يبدا يشوف مستقبله ويشوف هيعمل ايه ويقابل حازم نها على النت...

ايه النهاردة مش الخميس ولا الجمعة ومش ميعاد اجازتك...لا اصل انا خلاص راجع من شرم هستقر فى اسماعيلية تانى...بجد يا حازم والله اخيرا هترجع...مبسوطة ولا ايه...اه طبعا مبسوطة جدا والله مش هتعرف اد ايه...مانا قولت ارجع عشانك بردو...يا بكاش ههههههه ماشى المهم انك رجعت بالسلامة...

وتعدى ايام الاجازة بسرعة على حازم وفى الايام دى كان زى عصفور حد فتحله القفص وطار فى كل اتجاه ...سافر حازم القاهرة تقريبا كل يوم فى الاجازة وكان بيقابل البنات اللى اتعرف عليهم على النت وخد نمرهم عشان يضيعوا وقته هناك فى الجيش اللى فضل منهم صاحبه وكمل معاه وسافر اسكندرية وبورسعيد مسبش حد عرفه وكمل معاه الا وسافرله زى ما يكون بيرد ليهم الجميل انهم هونو عليه الجيش وقابل كتير وعرف كتير بس من جواه كان فعلا نسى حلمه الاولانى خلاص والحب والبنت الملاك اللى بيحلم بيها...

ويجى يوم التسليم وبعد عذاب وانتظار يسلم حازم مخلته ويستلم شهادة انهاء الخدمة ويبقى راجل حر بس كان احلى عذاب واحلى انتظار لانه خلاص بقى حر وهو خارج بيشوف فى طريقه الناس اللى لسه داخلة ويتعاطف معاهم ويدعيلهم من جواه ان مدتهم تعدى على خير ...

يخرج حازم وهو راجع بيته تجيله مكالمة من نيرمين...الو ايوة يا حازم ها خلاص اقول مبروك...طبعا الحمد لله خلاص...طب مبروك انا مبسوطة عشانك اوى...ربنا يخليكى...كان نفسى احتفل معاك بالمناسبة دى بقى...يلا تعالى انا مستنيكى...هههههههه بجد طب انا عايزة اجى والله...تيجى فين...اجى اسماعيلية عايزة اشوفها انا بسمع انها جميلة وكمان نفسى اسلم عليك يعنى لو تحب...ايوة بس هتيجى ازاى...عادى مش هروح الكلية بكرة وهركب اسماعيلية واجيلك ونقعد مع بعض شوية تفرجنى اسماعيلية وابقى امشى على الساعة 2 كدة او 3...خلاص اوكى تمام انا هستناكى وقبل ما تركبى الصبح كلمينى...اتفقنا...

وتتصل نيرمين بحازم الصبح وتقوله انها ركبت وخلاص قربت تدخل اسماعيلية ويركب حازم العربية ويروح يستناها عند الموقف الجديد وتتصل نيرمين تقوله انها وصلت...ينزل حازم ويدور على نيرمين وسط الناس كان عنده فضول شكلها بقى ايه وعاملة ازاى ولابسة ايه... وتظهر نيرمين من وسط الناس بمنظرها البرىء وتجرى على حازم...

ازيك يا حازم وحشتنى اوى وهى بتدمع وبتبص حواليها خايفة حد يشوف دموعها...لا بصى دموع وكدة الاتوبيس اللى نزلك لسه واقف اهو احجزلك وتركبيه وترجعى تانى...تضحك نيرمين وتقوله لا خلاص انا هضحك اهو...ايوة كدة مش جاية تحتفلى معايا بمناسبة خروجى من الجيش وتسلمى عليا...ايوة طبعا...خلاص يلا تحبى تروحى فين...مش عارفة بقى انت الاماكن اللى بتحبها نروحها كلها...ماشى يلا بينا...

وياخدها حازم ويلف بيها شوية يفرجها على شوارع اسماعيلية وطلع بيها على طريق البلاجات والقرية الاوليمبية ورجع تانى ونيرمين مبسوطة ومبهورة بجمال سماعيلية وفرحانة اوى...ايدا يا حازم انا بجد مكنتش متوقعة ان اسماعيلية جميلة كدة...امال ايه يعنى كنتى فاكرة ايه...لا اسمع انها جميلة بس مش بالشكل دة...يعنى صحتك جات عليها...اه والله مش عارفة حاسة انى مرتاحة اوى هنا...طب ما تاخديش على كدة عشان شوية وهتمشى...انت رخم يا حازم عارف كدة.....ههههههههه عارف...ماشى يا رخم سيبنى استمتع....

حازم فين النادى اللى كنت بتلعب فيه كورة وتنزل البحر فيه...اه نادى الضنفاه...عايزة اروحه...بس الساعة 11...وايه يعنى...لا يعنى مش بيبقى فى حد هناك دلوقتى...طب وايه يعنى دة حتى احسن تخيل اننا فى مكان وعلى البحر ومفيش حد غيرنا...ماشى يلا نروح يا مجنونة

ويروح حازم بيها الضنفاه وتعجب بالنادى جدا ...الله منظر الماية تحفة هو صغير شوية بس بجد جميل اوى...تعالى بقى نقعد ونجيب بيبسى ...اوكى عشان عايزة اكلم معاك شوية...ومكنش ينفع كلام من غير بيبسى...اه بقى ما ينفعش يا رخم بعدين انا ضيفة عندك عيب كدة...لا عيب عليكى دة انتى صاحبة مكان...ربنا يخليك يا رب...ويقعد حازم ونيرمين وهما بيشربو البيبسى ادام البحر...حازم عايزة اقولك حاجة بس ما تزعلش...خير...وحشتنى اوى...ميرسى ربنا يخليكى...حازم انا مكنتش باجى على بالك خالص من يوم ما سيبتنى...نيرمين بلاش الموضوع دة انا من اول ما كلمتك تانى واحنا اتفقنا نكون اصدقاء...عارفة انا بس بسال يعنى يا حازم انا عارفة ان مفيش حاجة ينفع ترجع...عشان ترتاحى ايوة كنتى بتيجى على بالى كتير اوى وكتير كنتى بتوحشينى لحد ما عديت بظروف وحاجات نسيت اى حاجة ليها علاقة بالحب...

على فكرة انا عايزة اقولك ان انا خطوبتى قريب...بجد والله الف مبروك...الله يبارك فيك هيخطبونى لواحد صاحب اخواتى وباباه وبابا بينهم مشاريع وحوارات كتير اوى ...اه جواز مصلحة يعنى ...يعنى عشان يحافظو على مصالحهم مع بعض...تمام ربنا يوفقك يا نيرمين ...شكرا...مالك...مفيش...طيب المفروض بقى ما نتكلمش تانى ولا نشوف بعض عشان انا لو مكان خطيبك مش هقبل بكدة...ماشى يا حازم سيبنى معاك لحد ما اتخطب ممكن تسيبنى عايشة الفترة دى كدة واوعدك اول ما اتخطب خلاص كل حاجة بينا انتهت...ماشى يا نيرمين...سيبنى بقى استمتع باللى انا فيه قبل ما اعيش حياة تانية...استمتعى يا مجنونة...

وتمر الايام وتكرر نيرمين الزيارة لاسماعيلية وحازم كذا مرة لحد ما جات اخر مقابلة بينهم لان خطوبتها بعد يومين خلاص زى ما قالت وفى نفس المكان كان الحوار دة...

حازم انا مش عارفة هعمل ايه من بكرة ...هتعيشى بقى وتتخطبى وتنسى كل اللى فات وصدقينى هتحبى حياتك الجديدة خصوصا لما تجبيلنا نيرمين الصغنونة...هههههه ايوة وحازم الصغنون.....لا يا عم بلاش حازم...وتبكى نيرمين فجاة وتقول لحازم...حازم انا مفيش لحظة من يوم ما سبتنى نسيتك كنت عايشة بفكر فيك وبقول لنفسى دة مسافر واتاخر شوية وندمت على انى غلطت فى يوم من الايام قبل ما اعرفك بس يا حازم والله ومعرفش حاجة .....ما تتكلمش سيبنى اكمل انا اخر مرة هشوفك وتشوفنى وعارفة اننا اصدقاء بس بالنسبة لك انت بس انما بالنسبة لى يا حازم انت كنت كل حياتى حتى وانت غايب...

صدقنى مكنش قصدى فى يوم اجرحك ولا اكدب عليك بس اعمل ايه بقى ربنا كان عايز كدة ومتتخيلش انا شيلت هم ورعب اد ايه من اللى كنت فيه وبعد كدة لما سيبتنى انا همشى ومش هتشوفنى تانى يا حازم وهروح لواحد اهلى هيجوزهونى وانا مش حاساه ولا عايزاه بس اخر كلمة بقولهالك انى بحبك اوى يا حازم فوق ما تتخيل ويلا انا لازم امشى بقى عشان الحق ارجع ومش عايزة اسمع منك تعليق...

يقوم حازم وهو مصدوم وادام دموع نيرمين قلبه حس بالذنب شوية بس منطقش ولا كلمة ووصل نيرمين وحجزلها وركبها الاتوبيس من غير ما ينطق وكان عايزها تمشى بسرعة قبل ما ينهار ويقولها انه كمان بيحبها اوى بس افتكر انه نسى الكلام دة وفاق لنفسه وكمان خلاص هى هتتجوز ويبقى ليها حياتها وهتنساه وحاجة جواه فوقته وقالتله عيش وسيبها تعيش...

ويتحرك الاتوبيس ونيرمين تجرى عشان تركب وهى بتقول لحازم خد بالك من نفسك عشان خاطرى وما تنسانيش وتركب نيرمين بسرعة وتجرى على الشباك وبعنيها المليانة دموع بتودع حازم لاخر مرة وحازم بيبصلها وهو من جواه قلبه وجعه اوى وحس بالذنب لاقصى درجة وكان نفسه يجرى وراها ويقولها انا بحبك بس خلاص كانت بعدت نيرمين وحازم بيتابع وهو مش مصدق اللى حصل لحد ما يتختفى الاوتوبيس وتختفى نيرمين للابد...

ويرجع حازم ويدخل اوضته وهو تعبان اوى نفسيا ويقرر يقطع صلته بكل البنات تانى لانه كان زعلان اوى من نفسه وكان نيرمين حركت جواه مشاعر كان اقرب انه خلاص نسيها وعمره ما هيحس بيها تانى وتفضل صورة دموعها وعنيها وهى بتقوله سامحنى ادامه فترة طويلة وينام حازم من كتر التفكير.....

وان شاء الله هنشوف ايه اللى هيحصل مع اليوميات الجاية....

الفصل الثالث والعشرون:-

يفضل حازم فى اوضته فترة مخنوق من اللى حصل ويفكر فى ايه اللى وصله دة عرف بنات كتيرة ودخل معاهم فى قصص حب وهمية وارتباطات بكل اللى يقابلها على النت كل دة عشان يضيعوله وقته وحس ان اللى قابلهم وحبهم بجد مكنوش زى ما بيحلم بيهم لانه هو استغل الموضوع غلط...

ويقرر حازم يفوق من اللى هو فيه وينسى حكاية نيرمين لانها اساسا كانت منسية من الاول ويقطع كل علاقاته بالبنات اللى عرفهم ويصارحهم بانه محبش حد ويبدا خطوة جديدة وفعلا يبدا حازم ويمسح ارقام البنات بعد ما يصارحهم بكل حاجة وعرفهم ليه واللى تعيط واللى تنهار واللى تقفل فى وشه...

ودخل مسح كل الايميلات لحد ما وصل لايميل نها ولسه بيمسحه دخلت نها وتقول لحازم ازيك لكن حازم ما ردش...حاااااااااازم انت فين....ايوة يا نها معاكى...مالك يا حازم فى ايه مش متعودة ما تردش عليا على طول حتى لو معاك مين...انا مش معايا حد...كمان لا كدة فى حاجة كبيرة مالك احكيلى...

مفيش زعلان من نفسى شوية...ليه بس....يعنى غلطت فى حق ناس كتيرة وحاسس بالذنب شوية مع انى مكنتش اقصد كدة خالص...خلاص يا حازم قولهم الحقيقة وانك مكنتش تقصد وان شاء الله يسامحوك وتبقى كويس...انتى عافة انا كنت همسح ايميلك دلوقتى...نعم يا حازم تانى بردو مش كفاية اخر مرة حصلت واتفقنا انك مش هتعمل كدة تانى يا حازم انا رخيصة عندك للدرجادى...

لا والله بس اصل انا مخنوق اوى وحتى انتى انا كدبت عليكى مع انك احلى بنت قابلتها فى حياتى رغم انى عمرى ما شفتك...وجزاتى بقى انك تمسحنى مش كدة وكدبت عليا فى ايه...انا مكنتش بشتغل فى شرم طول السنة اللى فاتت انا كنت فى الجيش ومعرفش ليه مقولتلكيش...ياااه يا حازم كل دة وانت بتضحك عليا طب ليه وتخبى حاجة زى دى ليه ويا ترى كدبت عليا فى ايه كمان انا مستغرباك اوى يا حازم...

انا اسف يا نها انا كمان مستغرب نفسى وانتى لسه بتقوليلى ارجع زى ما كنت وانا برجع زى ما كنت عشان ابدا من جديد وانا عارف انك مش طايقانى دلوقتى وعايزة انتى اللى متعرفنيش تانى بس قبل ما تمشى سامحينى وبعدين امشى... حازم انا لازم امشى انا مصدومة اوى فيك بس انا اللى غلطانة انى صدقتك فعلا كل الولاد اللى على النت كدابين بس انا مكنتش بصدق لانى عرفتك سلام...

وتخرج نها وحازم زى المجنون لا ما تمشيش ويزعل حازم اوى من نفسه ويفكر يعمل ايه الا نها دى فعلا اجدع واجمل شخصية اتعرف عليها وعمرها ما زعلته وبالعكس كان دايما بيجى عليها وهى تسامحه ودايما معاه فى كل المناسبات وجنبه لو زعلان وعمرها ما حبت ولا ليها فى المواضيع دى والوحيدة اللى رفضت تديله نمرتها وطول السنين دى معاه بس هو مش حاسس انها قريبة اوى منه كدة ويقرر حازم انه ينساها واهى زى اللى راحو قبل كدة مش هتفرق......

يفضل حازم كل يوم على الحال دة ويخرج مع صحابه ويرجع لكن نها مش قادر يشلها من باله وكل يوم كان بيفكر فيها اكتر من اليوم اللى قبله ويقرر حازم انه مش لازم يسيبها تضيع منه او على الاقل ما تنساهوش وهى زعلانة منه بالشكل دة ويفكر حازم يعمل ايه يوصلها ازاى....

اه مفيش غير مريم لازم اخد نمرتها من مريم واكلمها بس لازم ادخل على مريم دخلة جامدة عشان تقتنع انها تدينى نمرة نها....ويتصل حازم بمريم...هاى مريم ازيك...الحمد لله انت اخبارك ايه...ايه انتى فين من زمان ولا رنة ولا اى حاجة امال صداقة ايه بقى...لا والله بس انت عارف المذاكرة والدروس والله شغلانى اوى يا دوب وقتى بيخلص عليهم بص فى بالى والله دايما اكلمك...

تمام ربنا يكون معاكى يا رب ان شاء الله واشفوك دكتورة اد الدنيا ...دكتورة ايه انا كنت ادبى...دكتورة فى الكلية يا مريم....هههههه اه كدة ماشى...بقولك ايه صحيح كويس انى افتكرت اصل انا غيرت موبيلى وكان فى نمر مسجلها على الموبيل مش على الخط ونمرة نها راحت منى ممكن تديهانى عشان اسجلها تانى(ويدعى حازم يا رب تجيبها يا رب)...اه نمرة نها طيب ثوانى كدة...

اه اهى النمرة وتديله النمرة....ويفرح حازم ويسجل النمرة ويقفل مع مريم ويبدا يجهز نفسه عشان يشوف هيقولها ايه بالظبط ويتردد حازم انه يتصل وفى الاخر يقرر يتصل وزى ما تيجى تيجى...ويتصل حازم...الو...الو نها معايا...مين معايا...نها انا حازم لو سمحتى ما تقفليش انا هقولك جيبت النمرة ازاى بس فى كلمتين لازم اقولهو ملك الاول ممكن تسمعينى...اوكى يا حازم قول بس قولى الاول جيبت النمرة ازاى...من مريم بس والله هى ما تعرف انى مكنتش اعرفها انا قولتها ضاعت منى...وكان لازم اكلمك ضرورى...اوكى خير...انا ما نمتش من ساعة اخر مرة لما قفلتى معايا بس عايز اقولك انى والله مش وحش ولا كان قصدى اكدب عليكى خالص انا كنت وانا داخل الجيش متخبط وخايف عشان تجربة جديدة عليا ومحرج اقول لحد انى داخل الجيش......

انا عارف انك مش طايقانى بس انتى مش عارفة انا بجد ما ا قدرش استغنى عنك يا نها والله ومعرفتش كدة الا لما مشيتى وزعلتى منى ومش عايز منك حاجة ونمرتك همسحها والله بس قولى انك مسامحانى ومش زعلانة منى...تعيط نها شوية وتقوله انت عارف انا حسيت اكنى بنت من الشارع ومش فارقة معاك تمسحنى بمزاجك وتضيفنى بمزاجك وتكدب عليا مع انى مش وحشة معاك....انا بتاسفلك من كل قلبى والله يا نها حقك عليا...خلاص يا حازم انا مسمحاك بس انا خلاص مش هكلمك تانى ويا ريت نمرتى تنساها...حاضر يا نها المهم انك سامحتينى انا خلاص همشى ....

نها...نعم عايز اقولك حاجة قبل ما امشى...ايه...انا بحبك اوى يا نها.....نها قطعت النفس ومردتش ولا كلمة...بصى انا عارف انك مش هتردى عليا ولا هتفرق بس كان لازم اقولهالك انا فى الكام يوم اللى اتو حسيت بيها واتاكدت منها وبجد كان لازم اقولك ومش مستنى منك حاجة انا عايزك بس تعرفيها عشان انا ارتاح سلام...

ويقفل حازم و هو زعلان اوى ان حس بالحكاية دى متاخر اوى وخصوصا كمان انها سابته بطريقة مش هى وهو قاعد بيفكر تجيله رسالة على الموبيل من نها وكان فيها ايه الرسالة ديه

ده اللى هنعرفه الفصل الجاى....

الفصل الرابع والعشرون:-

يفتح حازم الرسالة وهو ملهوف وقلقان يا ترى نها بعتة تقوله ايه اكيد تأكد عليه انه ميتصلش بيها تانى ويمسح نمرتها وكان فعلا هو من نفسه هيعمل كدة لكن يفتح الرسالة ويشوف فيها ايه وكان فيها يادوب جملة واحدة.... عايز تكلمنى فى وقت كلمنى ومتمسحش النمرة...ويفرح حازم جدا ويكلم نها بس يقول لا كفاية كدة النهاردة انا هبعتلها رسالة اقولها شكرا وهكلمك بكرة ويبعت حازم الرسالة...وترد عليه نها برسالة تانية اوكى مستنياك...

ويرتاح حازم اوى وزى ما يكون هم تقيل واتشال من عليه وينام حازم وتانى يوم يتصل بنها وترد عليه...ازيك...الحمد لله...انا متشكر اوى يا نها انك سامحتينى ومش زعلانة...وتبكى نها برقة اوى وتقوله انا بس مش مصدقة انى كنت رخيصة عندك وانا فاكرة انى حاجة تانية...نها وحياة اغلى حاجة عندك تنسى الموضوع دة لانك بجد بقيتى اغلى حاجة عندى دلوقتى...ماشى يا حازم هنساه...من قلبك...اه من قلبى...

طيب انا فى سؤال كدة كنت عايز اسالهولك...اسال...انا كل دة معرفتش ردك ايه على اللى قولتهولك امبارح...اللى هو ايه بالظبط...انى بحبك...بص يا حازم انا حسيت وانت بتقولها انها فعلا من جواك ولمستنى انا كمان لانى كنت حاسة انك صادق اوى وانت بتقولها وانا مش هقدر ارد عليك دلوقتى فى الموضوع دة بس مش معناه برفضك بالعكس انا مرتحالك اوى...امال طيب هتردى عليا امتى...بص احنا هنفضل اصدقاء زى ما احنا لحد ما اخلص امتحاناتى عشان انا عايزة اركز اوى فى الثانوى وبعد ما اخلص هيبقى لينا كلام تانى...

بس احنا فى اخر 4 يا نها ولسه امتحاناتك فى 6 هستنى كل دة...هو دة طلبى يا حازم لو عايز تستنانى اوكى مش عايز خلاص بس انا اتمنى تستنانى...هى دى يعنى كدة عقوبة عشان انا كدبت عليكى وكدة....لا والله يا حازم بس انا فعلا مش هروح المدرسة خلاص ومليش غير الدروس وانى اذاكر وكمان مش هخرج وبابا او اخواتى اللى بيوصلونى الدروس يعنى مش هعرف اشوفك فى الفترة دى خالص...ولا مرة حتى يعنى يا نها نفسى اشوفك اكيد يعنى وانتى عارفة من زمان...حازم عشان خاطرى اعملى اللى بقولك عليه وانا مع اخر يوم امتحان هخرج منه واشوفك بعدين ما انا استنيتك كتير وانت كنت عملى بلوك وديليت من عندك...ماشى معاكى حق اوكى وانا هستناكى عشان انتى تستاهلى استناكى لو حتى العمر كله يا نها...

حازم اصارحك بحاجة...يا ريت...انا كمان بحبك ...ايدا بجد يا نها...ايوة وهى فى قمة كسوفها...والله العظيم اول مرة فى حياتى اقولها لحد ومش كلام بنات انت اكتر واحد عارفنى وبنتكلم من ايام ما كنت فى 3 اعدادى...عارف يا نها كويس انك اول مرة تقوليها لحد وان شاء الله اخر مرة...ان شاء الله وانا كمان كان نفسى انا اكون اول بنت فى حياتك بس هعمل ايه بقى انت مستنتنيش...صدقينى يا نها انا بجد والله حاسس انى اول مرة فى حياتى احب بجد...ماشى يا حازم لما نشوف بس اوعدنى مفيش كدب تانى...خلاص بقى مش اتفقنا ننسى الموضوع دة...ماشى اتفقنا...طب ايه بقى مش هشوفك...لا خلاص بقى اتفاقنا زى ما هو بعد امتحاناتى هنشوف بعض مش صارحتك انى بحبك...كتير اوى يا نها لسه 3 شهور ...مش قولت هتستنانى...ماشى خلاص هستناكى...بس كل يوم هكلمك وهتكلمنى طبعا اوكى...اكيد طبعا هو لاصوت ولا صورة مع ان انتى مش حاسة انا نفسى اشوفك اد ايه عايز اشوف مين اللى عملت فيا كل دة...هههههه مانا كمان نفسى اشوفك من زمان...ما انتى شوفتينى قبل كدة فى حفلة النادى...لا والله مكنتش اعرف ان انت ومكنتش مركزة...لا بقى مش هتشوفينى الا لما تخلصى امتحاناتك.....هههههههههه ماشى وانا موافقة...اه طبعا موافقة عشان على مزاجك ماشى يا نها يا رب تخلصى بقى امتحانات ونخلص...اه ادعيلى بقى...اكيد هدعيلك من قلبى...

وتخلص المكالمة ويقعد حازم مع نفسه وهو فرحان اوى بالحب دة وبيفتكر ازاى من كام يوم كان تايه ومع اى بنت يكلمها على النت ومع نيرمين ووداعها اللى اثر فيه اوى ونها اللى كانت ادامه من اكتر من 3 سنين وهى لسه طفلة وكان مسحها مرتين قبل كدة وبرغم كل دة هى اللى يحبها ويوقع فيها وكان احساس حازم المرة دى فعلا مختلف تماما حاسس انه متعلق اوى لاقصى درجة بنها فى حاجة غريبة عن المرات اللى فاتت ولما بيسمع صوتها بيرتاح يا ترى دة الحب الحقيقى اللى بيحلم طول عمره بيه بس الحلم لسه عليه كتير
...لسه هيستنى كتير اوى عشان يشوف نها ويا ترى لما يشوفو بعض هيفضلو يحبو بعض ولا رايهم هيتغير...

اسئلة كتيرة اوى تعدى على حازم ولكن حازم يقرر ينسى كل دة ويعيش فى حكايته الجديدة وحبه اللى اخيرا لقاه ويعيش اللحظة اللى هو فيها ويسيب الاجابات دى كلها للوقت هو هيجاوب عليها لوحده...

الفصل الخامس والعشرون:-

وتمر الايام وحازم ونها كل يوم بيقربو من بعض اكتر واكتر ولازم كل يوم الصبح نها تكلم حازم وقبل الدروس وبعد ما ترجع من الدروس وحازم قبل ما ينزل وقبل ما يخرج وبقى الاتنين بجد خلاص دايبين فى بعض من قبل ما يشوفو بعض...

الو...وحشتنى اوى...وانتى كمان بس لحقت اوحشك دة احنا لسة مكلمين بعض...اه طبعا وانت اساسا معايا كنت واحشنى بس مقولتلكش يعنى...يا جامد...شفت بقى...صباح الخير...لسه فاكرة صباح الخير...اه اصل وحشتنى اهم من اى حاجة ...ربنا يخليكى ليا يا رب طب ما نشوف بعض بقى...احنا قولنا ايه...طيب ماشى بهزر ...هانت بقى احنا فى نص 5 اهو...ماهى الايام تقيلة اوى وانا نفسى اشوفك...امال انا اعمل ايه ماهى اتقل عليا عايزة اشوفك وعندى امتحانات ومذاكرة وبلاوى...طيب يلا هنستحمل ويلا افطرى بقى واقعدى زاكرى وانا معاكى رنات بقى وكدة...طيب ماشى خليك جنبى اوعى تنام...لا مش هنام...طيب لو تعبت نام...لا انا معاكى هتفرج على التلفزيون...ايوة ما انت فاضى بقى يا بختك...انتى هتنقى عليا اقوم انام احسن يعنى...لا لا خلاص خليك معايا وانا بذاكر...حاضر معاكى والله...

انا نص ساعة ونازلة الدرس خش بقى انت نام شوية وانا لما ارجع هصحيك انا عندى درسين ورا بعض وبعدين هروح مع ماما اشترى شوية لبس وارجع هكلمك...ماشى خدى بالك من نفسك...تنام على طول احنا دلوقتى العصر وصاحيين من الصبح مفيش كمبيوتر ولا كدة...لا مفيش والله ما تقلقيش...ماشى لما نشوف....

الو...ايوة...حازم اصحى بقى وحشتنى اوى انا رجعت يلا اصحى عشان مش هعرف اقعد اذاكر الا وانت معايا قوم...طيب انا خلصت على فكرة مذاكرة من زمان اعتقد ذاكرت كفاية قبل كدة ....مليش دعوة مش انا حبيبتك...حبيبتى تبهدلينى يعنى....مليش دعووووووووووة هعيط ومش هذاكر وذنبى هيبقى فى رقابتك انا بعيط اهو مممممممممممممممممممممم.........بس خلاص خلاص انا صحيت اهو انا حاسس انى انا اللى فى ثانوى والله....

ايوة بصى انا نازل خارج مع صحابى شوية اوكى ومعاكى بردو رنات وهكلمك كل لما تخلصى جزء...ايوة يا عم ايوة اخرج بقى وروح قابل بنات وبتاع...اه اشطة مانا نازل اهو...اشطة فى عينك يا حبيبى على اساس انى بقى شوال جوافة ها...مش انتى اللى بتقولى ...لا ما تسمعش كلامى لما اقولك كدة بقى ما صدقت ها...

ايدا انتى بتاكلى وانتى بتكلمينى.....اه اصلى ما اتغدتش ......وبتاكلى ايه بقى.......باكل بوجو...نعم...بوجو....مين دة...بوجو يا حازم........ههههههههههههه بوجو يا حازم نها انتى لدغة فى حرف ال ر.....اه لدغة بقى عندك مانع........هههههههههههههههه

اسمه بوجو اسمه برجر يا ماما....حازم انزل بدل ما ازعل منك انزل يلا وروح قابل براحتك....اسمها قابل بواحتك.....ههههههههههههه.......ماشى يا حازم اتريق زى ما انت عايز......لا خلاص والله مش هتويق خالص بس على فكوة....خير....انتى كدة زى العسل بردو....ما تحوجنيش بقى يا حازم.....ربنا ما يحوجك لحد .........هههههههههههههههههه ماشى يا خفيف ما انت استلمتنى بقى....بحبك...وانا كمان بحبك اوى يا حازم بس تبطل رخامة هحبك اكتر...طب كملى البوجو قبل ما يبرد....

الو.....ايوة ....انت فين لسه خارج دة بردو شوية وراجع من الساعة 9 لحد 2 وشوية برة ينفع كدة...معلش القعدة خدتنا بقى...كنت مع مين...مع حسام واحمد ورامى...مفيش بنات...انتى شايفة اسامى حد فى دول بنات...مش دول ادامك مكنش فى...كان فى كتير...اه قضتها يعنى....اه قضتها بس مع بنت واحدة وبس هى اللى شغلانى ومش مخليانى اشوف حد تانى...يا سلام ومين الشملولة دى...مين ايه...الشملولة حضرتك...الشملولة حضوتك تبقى انتى...اتلم ..طيب انا خلاص 10 دقايق وراجع...طيب انا هدخل انام شوية ممكن تبقى تصحينى على الفجر لو سهران...خلاص اوكى نامى وانا هصحيكى ...تصبح على خير ...وانتى من اهله ...

وتعدى الايام بالشكل دة على حازم ونها ويعدى شهر 5 وتقرب الامتحانات بتاعة نها......

الفصل السادس والعشرون:-

تعدى الايام على حازم ونها وقبل الامتحان بيوم تتصل نها بحازم وتقوله انها قلقانة جدا ومرعوبة وحازم يطمنها انها ان شاء الله هتعدى وتجيب مجموع اللى هى عايزاه وتهدى نها وتدخل تنام عشان تصحى تراجع قبل الامتحان...

وتعدى نها اول امتحان والوضع زى ما هو وحازم دايما مع نها وهى بتذاكر وحتى قبل ما تروح الامتحان لازم تكلمه ويطمنها قبل ما تدخل اللجنة وبعد ما تخرج وهكذا لحد ما تخلص كل المواد ويتفضل امتحان التاريخ اللى كان قبله حوالى 11 يوم ويتقابل نها وحازم على النت...

ايوة فاضل التاريخ بس والحمد لله انا كنت مذاكراه كويس...طب تمام عندك دروس امتى...كل يوم لحد يوم الامتحان بس انا مش هروح غير بس اول يومين وخلاص اشوف المفيد واقعد انا اراجع مع نفسى...طب كويس ...عشان تعرفى تركزى بردو...اه عشان هبقى بضيع وقت وكلها مراجعات وامتحانات وانا اقعد اركز لوحدى احسن...طب كويس اوى يلا اسيبك بقى عشان تقومى تذاكرى وانا معاكى...حازم انا عايزة اقولك بجد انى متشكرة ليك اوى اوى اوى انت وقفت جنبى بطريقة عمرى محد كان هيعملها معايا...ايه يا بنتى فى ايه انا عشانك اعمل اى حاجة بعدين دى حاجة بسيطة يعنى ايه اللى فيها...ربنا يخليك ليا يا حازم...شدى انتى بس حيلك وما تضيعيش المجهود دة على الفاضى...متقلقش الى عدى كان تمام وان شاء الله التاريخ دة انا كفيلة بيه...ماشى يا جامد ربنا يوفقك ان شاء الله...

وفى يوم من الايام وحازم كان مع حسام صاحبه راجعين من الخروجة من طريق البلاجات وتتصل نها بحازم...ازيك...كويسة الحمد لله...مالك صوتك متغير كدة...لا اصلى زهقت والحياة بقت ملل اوى ال 11 يوم دول خنقة اوى وكل صحابى خلصوا وانا الوحيدة التاريخ لسه مخلصش...هانت بقى يا نها خلاص دة الامتحان بعد بكرة...مانا حاسة انى عايزة امتحن حالا ارمى كل اللى عارفاه فى الامتحان وامشى اروح بقى...هانت خلاص وانا معاكى اهو...انتى بتعملى ايه دلوقتى ...مفيش انا واقفة فى البلكونة زهقانة شوية...

على فكرة انا جنب بيتك يا نها...يا سلام...اه والله كنت راجع من البلاجات ومروح...طيب عدى كلمنى وانت تحت وانا فى البلكونة...دلوقتى الساعة 2...مش عايز تشوفنى...اشوفك مين يا بنتى انتى ساكنة فى برج ضخم وكمان فى الدور السابع...اهو اى حاجة تصبيرة او بروفة لبعد بكرة مش عايز خلاص...

لا خلاص اوكى انا جايلك هركن العربية وفيها حسام قبل البرج بشوية وامشى...ويوصل حازم وينزل على رجله...ايوة يا بنتى انتى فين...ايوة انا شفتك اهو مش انت اللى لابس تى شيرت ابيض...ايوة انا ومش محتاجة ذكاء هو فى حد فى الشارع غيرى اساسا...ازيك...الحمد لله...مش مصدق انك واقفة اهو وانا شايفك...صحيح مش شايفك اوى انا شايف خيال بس اهو يعنى بقى...مش انت قولت هانت...صح انا استنيت اكتر من 3 شهور مش هتيجى على يومين...

ويفضل حازم يكلم نها لحد ما يوقلها لا والله انا مجنون واعملها...يا سلام ولا تقدر طبعا...ولو عملتها...متقدرش...طب بصى يا نها انا........ويشيل حازم الموبيل وباعلى صوته بحببببببببببببببك.....يا مجنون يا حازم والله انت مجنون ينفع كدة...مش انتى اللى قولتى اقول كدة وقولتى مش هقدر...حازم امشى الناس دلوقتى اكيد هتصحى...الناس صح تصدقى نسيت ان فى ناس فى الدنيا معانا...حازم انت بجد مجنون اوى يلا لو سمحت عشان محدش يتخانق معاك...:7ob

محدش يقدر عنى ...هنزل بس عشان خاطرى امشى مش عايزة اقلق عليك لو سمحت ... حاضر همشى لان فعلا فى بلكونات ابتدت تنور...طب ممكن تمشى بقى بجد بليز يا حازم...حاضر خلاص انا مشيت اهو بس قبل ما امشى ادينى عرفتك انى مجنون وعملت اللى قولتى مش هقدر اعمله...:

ويشاور حازم لحسام ويجيله بالعربية وينطلق قبل ما حد يشوفه...ويعدى اليومين وتتصل نها بحازم قبل الامتحان وتطمنه انها هتحل كويس ان شاء الله عشان خاطره واول ما تخلص هتكلمه عشان تتفق هتشوفه امتى وازاى.....

الفصل السابع والعشرون:-

ويقعد حازم مستنى نها لما تكلمه وتخلص اخر مادة ليها فى الامتحانات ويقوم حازم وينام ويقوم والوقت بيعدى عليه تقيل وبطىء اوى زى السلحفاة...ويعدى الوقت واخير يخلص وقت الامتحان وتتصل نها بعد شوية.......حازم انا خلصت اخيرا...مبروك ايه عملتى ايه...الحمد لله تمام زى الفل...زى الفل ايه هو انا بسالك على الغسيل...زى الفل يا حازم يعنى حليت تمام الحمد لله...طب تمام الحمد لله...يلا عايز حاجة...عايز حاجة ايه......ههههههههه بهزر معاك......اه ما انتى فوقتى بقى...لا والله يا حازم دة حتى بعد ما خلصت حل قعدت افكر فيك وفى اللى هيحصل النهاردة...

وبعدين كان فى سؤال عن صلاح الدين والصليبيين فا افتكرتك على طول...ليه افتكرتينى يا ماما مرتبطة بمراد بك ولا ايه...لا يا اخى عشان انت كنت دايما تقولى انك بتحب فيلم الناصر صلاح الدين اوى...طب مش عيب يعنى عشان قولتلك حاجة تمسكيهالى زلة بقى ولا ايه....زلة ايه بس يا ابنى بطل خفة بقى ها....ماشى هنبطل بس قوليلى بقى هشوفك فين النهاردة وامتى.....بمناسبة التاريخ هشوفك فى القلعة بقى....لا بصى بقى كدة من اللى خفيف تهدى بقى شوية ممكن...ماشى....

طيب هشوفك امتى وفين...بص انا هروح ارتاح بقى شوية وبعدين انا نازلة مع صحابى الساعة 7 رايحة كنتاكى وبعد كدة هخرج معاهم...اه وبعدين...وبعدين انا بقى هشوفك ادام كنتاكى...يعنى دة اليوم التاريخى اللى احنا مستنينه تقوليلى هاجى اشوفك دقيقة ونمشى وتكملى خروج مع صحابك...يا حازم ماهو احنا اول مرة نشوف بعض وانا متوترة...متوتوة ايه بس بحرفك البايظ دة قولى قلقانة ههههههه...

ماشى هسيبك عشان اول مرة هنشوف بعض فيها ويارب ما تكونش الاخيرة...ماشى هستناك...

ويقوم حازم وقبل الميعاد بنص ساعة يبتدى يجهز هيلبس ايه ويضرب شعره سبايك ويسمع عمرو دياب ويحط برفان بتاعه وينطلق حازم الى مكان المقابلة...واول ما يوصل ادام كنتاكى يدور فى كل مكان على نها مش لاقيها ويتصل بيها...ايه يا بنتى انتى فين...انت فين وصلت...اه وصلت ومستنيكى برة...طيب انا خارجالك اهو حالا....

ويتصدم حازم تخرج بنت تخينة شوية وشكلها يعنى اقل من العادى وتضيع كل الصور اللى رسمها حازم فى خياله لنها طول السنين دى ويحاول حازم يشوف اى منفذ يقلب منه لكن مش لاقى اتثبت فى الارض تثبيتة غريبة وتقرب نها وخلاص بقت ادامه....

وفجاة تكمل من غير ما تكلمه وتطلع مش هى نها خالص ويمسك حازم قلبه ويسند على العربية من الخضة اللى ملهاش اى لازمة دى خالص ويبص على باب كنتاكى وتخرج منه اجمل بنوتة شافها فى حياته
شعرها قصير وناعم اوى وستايل جميل جدا جدا وكل ملامحها شبه حلا شيحة بالظبط بس كانت قصيرة جدا وحازم بيحب البنت القصيرة بس نها كانت اقصر من حلمه شوية كتير...

وتقرب نها وحازم قلبه بيدق يا رب دى تكون نها يا رب تكون هى مش مشكلة قصيرة هتلبس كعب تطول وتقرب نها اكتر وحازم قلبه بيتخطف اكتر وفجاة هاى حازم...مش انت حازم...ويرتبك حازم لا ...قصدى اه هو...قصدى اه انا هو يعنى....

هههههههه مالك يا ابنى فى ايه...اتصدمت فيا مش كدة...اه يعنى لا مش اوى اصل ...عارفة انت كنت متوقع انى اكون طويلة هى ديه مشكلة حياتى بقى انى قصيرة شوية...لا مش مشكلة خالص فى حاجات تانية تعوض القصر...طيب كويس اوى....ويفضل حازم يحكى هو ونها شوية بعد ما انبهاره واول خطفة راحت منه واستوعب اللى بيحصل حواليه....

دول صحابك خرجوا مش كدة اصلهم عماليين يدوروا عليكى ...اه دة هما اللى بيرنو طب حازم لازم امشى...اوكى بس معرفتش رايك فيا ايه...مش هقدر اقولك هكلمك لما اوصل النادى واقولك كل حاجة اوكى...اوكى هستناكى...ويمشى حازم ويفكر يا ترى عجبتها يا ترى قلبتنى طب امت تتصل ولا اكلمها انا وياخد حازم ويدى مع نفسه طول الطريق وفجاة....

ايدا انا فين انا ايه اللى مشانى من هنا ايدا دة مش طريق البيت خالص انا مالى مخطوف كدة...كان حازم مخطوف لان نها كانت بالظبط فعلا نفس صورة البنت اللى دايما بيحلم بيها ملامحها عنيها طريقة كلامها شخصيتها ضحكتها مفيش حاجة قلت ولا حاجة زادت...وفجاة تتصل نها بحازم...

ايوة يا حازم انا وصلت النادى...سمد الله على الحلامة...ايه...قصدى حمد الله على السلامة معلش اصلى حران شوية فا الكلام بيهرب منى...طيب كنت عايز تعرف راى...اه ياريت...حازم انت عسول اوى واحلى مما كنت فكراك وبجد انا دلوقتى حاسة انى مرتبطة بيك اكتر من اى وقت وبالنسبة لخروجى مع صحابى النهاردة معلش عديها واوعدك انى هعوضك عن كل الفترة اللى فاتت...

ويفرح حازم جدا ويطير من الفرحة اوى لاول مرة يحس انه فعلا حقق حلمه ومكنش يعرف ان حلمه دة بيقربه اكتر واكتر من نهاية عمره ما كان تخطرله على باله ولا يتمناها ويروح حازم ويقرر ينام لانه الفترى الاخيرة كان بيسهر كتير ومش عايز يسمع او يشوف اى حد فى اليوم دة بعد نها

الفصل الثامن والعشرون:-

تتصل نها بحازم تانى يوم وتقوله انها خارجة مع صحابها ورايحين الجندول وهتستنى لما تعرف الساعة كام بالظبط هينزلو وتبقى تقوله عشان يجى وفعلا يتفقو وتتصل نها بحازم وتقوله انها نازلة ومستنياه هناك...
ويروح حازم على الجندول ويروح ويوصل فى المكان اللى متفقين عليه ويلاحظ نها مع شلة بنات وولاد كتيرة ويرنلها وتشوفه وتجيله...تحب نقعد فين...تعالى نقعد ادام البحر عشان انا بحبه اوى...اوكى يلا بينا...صحابك دول...اه فى ناس صحابنا من واحنا فى حضانة وفى صحاب صحباتى وصحاب صحاب صحباتى وطبعا صحباتى...ياااه كل دول ...اه احنا دايما بنخرج كلنا كدة...ودة ليه...يعنى كل واحدة طبعا بتقول لصاحبها احنا فين وفى ناس بيجيبو اصدقائهم معاهم...

ويجيبو صحابهم معاهم ليه هى رحلة وكل خروجة ليكى بتبقى كدة...حازم احنا نعرف بعد من واحنا عيال صغيرة ما تقلقش عليا وكان ممكن ارتبط باى حد فيهم من زمان بس انا خلاص لقيت الانسان اللى بحلم بيه...ماشى تمام انا مش قلقان من حاجة بس محبش حد يقول عليكى كلمة...بتغير عليا...اه طبعا بغير...طب ما انا كمان بقى بغير عليك واوى كمان...

وتستمر مقابلات نها وحازم فى كل مكان تقريبا فى اسماعيلية راحوه وكان ليهم فيه ذكرى الضنفاه الجندول حتى الشوارع اللى مشيوا فيها وتخلص اجازة الصيف وحازم ونها تقريبا بقو شخص واحد فعلا من كتر ما حبوا بعض وكان حازم بجد بينسى الدنيا لما يقابل نها ويكون معاها ولا لما يسمع صوتها ويكلمها وبقت نها هى كل حياته وهو فعلا كان كل حياتها وابتديت تغير عليه من حتى بنات قرايبه وخناقات لو عرفت انه كلم دى اوى دى لكن كانو دايما بيرجعوا لبعض بحب اكتر من الاول...

ووصلوا لدرجة انهم اختارو ههيفرشو شقتهم ازاى لما هيجوزوا وكمان سمو عيالهم لو بنت هيكون اسمها ايه وطلبت نها اسم رنا وطلب حازم اسم جويرية وفى الولاد طلب حازم اسم عمر او على وطلبت نها اسم سامح...
وعشان ما يختلفوش اتقفقو انهم يجيبوا كل العيال دى عشان محدش يزعل واستمر حازم عايش فى حلمه الجميل لكن كان فى حاجة مضايقاه من نها ودايما خايف منها انها متقدرش تقابله لوحدها من غير الشلة لازم يقرروا الاول هما هيروحو فين وبعدين تقول لحازم هتنزل تروح فين ويروحلها هناك والوضع دة مكنش عاجب حازم وخصوصا ان كان بيبقى معاهم ولاد كتير وهو مش بيحب كدة لحد ما فى يوم بيعاتب نها...

بردو هستنى لما اشوف صحابك هيروحو فين الاول انا زهقت من الموضوع دة ليه منحددش احنا وننزل وملناش دعوة بيهم...ما ينفعش يا حازم انا متعودة على كدة وماما وبابا عارفين اللى بخرج معاهم مقدرش انزل مخصوص عشانك من غير ما يكون معايا صحابى وخارجين هما كمان...يا نها انا كمان مش عجبانى انك تخرجى وفى ولاد كدة معاكو...يا حازم وفيها ايه انا نفسى تيجى وتتعرف عليهم وتبقى منهم...

يا سلام انتى بتتكلمى ازاى يا بنتى اعرف مين واصاحب مين دول اصغر منى بخمس او ست سنين وكمان انا مش هصاحب حد عشان اشوفك يعنى او ابقى جنبك ناقص كمان تقوليلى اخد اذن منهم بعد كدة عشان اشوفك...

لا يا حازم خلاص انا هعمل اللى انت عايزه وهتغير عشانك هحاول انزل عشانك وابعد عن الولاد اللى انت عايزه هعملهولك...

يرتاح حازم شوية ويستمر الوضع زى ما كان وترجع القصة الجميلة تانى والحياة بينهم جميلة والاتنين فعلا خلاص بقو بأحساس واحد وقلب واحد وفى يوم بعد خروجة...

مين اللى بعد ما مشيت جه وسلم عليكى دة فى النادى مفيش دة مينا وصاحبنا من زمان اوى...كان معاكى فى الفصل...لا هو اكبر مننا وكان صاحب صحابى لحد ما بقينا اصدقاء...ماشى بس لو سمحتى ما يقفش معاكى كدة لوحدكو تانى...ايه يا حازم دة حتى بيحترمك جدا...والله وانتى عرفتى منين انه بيحترمنى...هو قالى كدة...وقالك كدة فين ...ماهو بيكلمنى يا حازم...الله وايه اللى جاب سيرة انه بيحترمنى...ايوة يا حازم ماهو اصله مرة جه وقالى ان هو بيحبنى بس هو مش مستنى منى اى حاجة ولا اى رد وقالى انا عارف انك بتحبى حازم اوى وهو انسان محترم جدا ويستاهلك...نعم جه قالك بيحبك ...اه يا حازم بس هو محترم اوى وقال انه مش مستنى منى حاجة ولا رد...

انتى عبيطة ولا ايه يا نها دة اسمه مينا انتى هبلة يعنى ايه ولا انتى عبيطة بجد يعنى ايه يجى يقولك حاجة زى دى ... انا عارفة انه غلط وماينفعش وهو قال كدة...ولما هو قال كدة يقولك من الاساس ليه ويعنى ايه مش مستنى حاجة طب افرضى انك كنتى رديتى عليه وحبتيه انتى كمان انتى اجننتى ولا ايه...يا حازم اهدى انا كنت بس عايزة اعرفك انه بيقول عليك محترم وان هو انسان محترم...

انسان محترم يبقى يعرف حدوده فين واخره فين مش يجى يقولك كلام زى دة بس الغلط مش عليه الغلط عليكى انتى اكيد انتى اللى ادتيله الفرصة عشان تحصل حاجة زى دى لان لو مفيش منك تشجيع وقبول عمره ما كان هيجروء يقولك حرف من اللى قاله دة...حازم كفاية بقى ...كفاية بقى انتى وطبعا بعد ما قالك كدة قولتيله احنا اصدقاء والكلام الفاضى دة بدل ما تهزقيه وتوقفيه عند حده انه قال حاجة زى كدة...يا حازم...ولا حازم ولا بتاع هى كلمة واحدة ولا مينا ولا حد من الولاد تكلميهم عايزة تخرجى تخرجى مع صحابك البنات بس وتقطعى مع كل الولاد دول اخواتك بقى فى المدرسة اخواتك فى الرضاعة مليش دعوة بالكلام دة يا اما انتى من سكة وانا من سكة...

لا يا حازم انا مقدرش اعيش من غيرك وانت عارف كدة كويس انا عايشة عشانك وعشان تبقى مبسوط حاضر انا هقطع مع كل اللى اعرفهم ومينا دة خلاص اعتبره انتهى بس اوعى تقول كلمة هتسبنى دى تانى.....

ماشى لما نشوف يا نها ايه اللى هيحصل وسلام دلوقتى عشان انا مصدوم فيكى...ما تزعلش منى انا اسفة لو غلطت فى حاجة حقك عليا وخلاص اللى عايزه ويرضيك هنفذه...ماشى يا نها اوكى خلاص حصل خير

وتبدا نها فعلا فى تنفيذ وعدها وتقطع مع كل الولاد ومبقتش بتخرج الا مع صحابها البنات وفهمتهم ان لو هيجيبو حد من صحابهم يقولولها عشان ما تخرجش معاهم...وترجع الاوضاع اكتر من ممتازة والغريب ان حازم ونها كانو كل ما يتخانقوا يرجعو اقوى من الاول....

وتعدى الشهور ونها تنجح وتدخل كلية سياحةويحتفل حازم ويعمل مفاجاة لنها ويعملها حفلة ويكلم صحابها عشان يعملولها مفاجاة وتفرح نها اوى بيها وتعدى الشهور والوضع زى ما هو ويجى شهر رمضان عليهم ويجيب حازم الفانوس لنها وبقولها انه موافق انها تخرج مع صحابها لو معاهم صحابها الولاد اللى عارفين بعض من ايام الحضانة بس لو صادف وجود مينا تمشى على طول من غير ولا كلمة وتفرح نها اوى بكدة عشان بس انها مبقتش بتخرج الا مرات قليلة لما بتكون الخروجة بنات بس

وفى يوم من الايام تتصل نها بحازم وتقوله انها معزومة على الفطار برة مع صحابها فى طريق البلاجات وهتفطر وتقعد شوية وترجع على طول ويوافق حازم ويقولها متتاخريش وتحصل مفاجاة مكنتش متوقعة....

الفصل التاسع والعشرون:-

تروح نها العزومة اللى على الفطار مع صحابها وقبل ما تروح تكلم حازم وتقوله انها نزلت...ويادوب مفيش خمس دقايق ويلاقى نها بتتصل بيه...ايوة يا حازم...ايه فى ايه انتى مش بتفطرى ليه...مفيش اصل انا رجعت البيت...ايدا ليه كدة حصل ايه يعنى عشان ترجعى البيت زعلتى مع صحابك...لا ابدا اصل لقيت مينا جه يفطر معانا قمت مشيت مش انت قولتلى ما اكونش معاه فى مكان واحد...ودة ايه بقى اللى يجيبه اساسا يفطر معاكو هو كان صايم ولا ايه...يا حازم هو جاى مع صحابه انا مليش دعوة...لا كويس اوى يا نها..

طب وما سلمش عليكى...سلم يا حازم...وانتى عملتى ايه...عادى سلمت عليه ومشيت وانا ماشية هو جه ورايا وقالى مالك بتهربى منى ليه هو انتى زعلانة منى...قولتله لا ابدا مفيش حاجة احنا اصدقاء بس تعبانة شوية...انتى عارفة يا نها انتى مفيش فايدة فيكى والموضوع دة فى يوم هيفرق ما بينا...ليه يا حازم مانا عملت اللى انت عايزه اهو...اللى انا عايزه يا نها مش دة خالص...احنا اتفقنا هتقطعى اصلا معرفتك بيه ليه اساسا يجرى وراكى ويقولك بتهربى منى ليه هو بيجرى ورا حبيبته ولا ايه دة عتاب اتنين بيحبو بعض...

وازاى اساسا تقوليله لا احنا اصدقاء بدل ما تردى عليه وتهزقيه وتقوليله ايوة انا زعلانة عشان انت قولت كلام مكنش ينفع تقوله بس انتى مش هتقدرى تقولى كدة عارفة ليه يا نها عشان انتى من الاول ما وقفتوش عند حده اللى اتخطاه وكسره واحترمتى مشاعر اصلا غير محترمة وانتى فاهمة غير محترمة ليه ولا انتى طفلة مش عارفة وقلتيه عليه محترم لو محترم صحيح كان احتفظ لنفسه بالمشاعر دى وكمان خصوصا لما عرف وشاف انك ارتبطتى بواحد خلاص عرفتى ليه زعلت منك وقولتلك الحق عليكى انتى مش عليه واديه اهو بيجرى وراكى يعاتبك يقولك بتهربى منى ليه قصده بتهربى من حبى ليه

ايوة يا حازم معاك حق بس اعمل ايه يعنى ...ما تعمليش حاجة انا كدة مش هينفع اكمل مع بنت زيك وبتتعامل مع حد من المفروض انتهى بالنسبةلها لما عدى حدوده بالطريقة دى انا مش طايق الوضع دة وانا هتعامل معاه وافهمه غلطه كويس اوى...يا حازم ارجوك مفيش داعى الموضوع يكبر وهو تافه ومش هنضيع حبنا بسبب حاجة زى دى انت قولت انه ما يستاهلش انت عارف انا بجبك اد ايه وانا دلوقتى فهمت قصدك ايه بجد حقك عليا...

حازم انا اتغيرت عشانك وحاجات كتير عمرى ما كنت بعملها عشان ارضيك عملتها عمرى ما كنت بخرج مع ولد لوحدى صحيح بخرج مع ولاد كتيرة هتقول كدة بس دول صحابى من سنين ومش بكون لوحدى بكون وسط بنات صحابى وعمرى ما قاطعت صحابى بس انا راضية بكدة ولما بعمل كدة انا كمان بكون مبسوطة اوى مش عشان انت مبسوط عشان انت بتحسسنى انك بتخاف عليا بجد وانى فعلا حبيبتك وانى كل حياتك والله بتغير عشانك وهتغير اكتر لحد ما ابقى زى مانت حاببنى اكون بس التغير بياخد وقت وانا لسه صغيرة يا حازم ارجوك استحملنى واستنى عليا وانا بجد بتعلم وعمرى ما هعمل حاجة تزعلك ولا تضايقك حازم انا مش عايزة حاجة من الدنيا دى كلها غيرك انا من حبى ليك يا حازم نفسى احطك فى برطمان واشيله وعمر ما حد يشوفك ولا يكلمك غيرى...بس انا كدة هتخنق مش هعرف اتنفس وبعدين برطمان ايه دة اللى هيشلنى...قلبى يا حازم...

ويتاثر حازم بكلام نها ويهدى انفعاله شوية...ويا حازم لما بقولك ما تحتكيش بمينا ده معناه انى خايف تحبيه انا اساسا ولا عمرى دة يجى فى بالى الدنيا كلها ايه جنبك يا حازم وهى بتعيط انا بقولك كدة خايف عليك ليه تكلمه والموضوع هايف وفى ادينا نتجنبه وانا فهمت قصدك وليه تتحول خناقة ولو حصلك اى حاجة انا هموت يا حازم...مش هتوصل لخناقة يا نها فى كلام وفى حاجات تانية كتير غير الخناق بيوجع اكتر ...ليه يا حازم ليه ندخل نفسنا فى كدة بجد انا خلاص انتهى والله بالنسبة لى والله فهمت وجهة نظرك ممكن بقى تنسى الموضوع دة عشان خاطرى ومتضايقش نفسك ...حاضر يا نها هنساه وهكبر دماغى المرة دى...ايوة كدة انت عارف مقدرش اعيش من غيرك وكمان بقى حصل حاجة هناك قبل ما امشى...خير...ناس بيسلمو عليك اوى...مين دول...الست مريم هانم قالتلى لو كلمتيه سلمى عليه اوى وحشنى...اه مريم عاملة ايه...اه مريم بقى ان شاء الله...سيبك منها هى عرفت اننا ارتبطنا...لا مرضتش اقولها...ليه...وتعرف ليه...تعرف عادى يعنى زى ما كل الناس تعرف...لا تعرف زيها زى الناس او بالصدفة مش هنقولها مخصوص يعنى...صح معاكى حق عاجبنى فيكى ان دماغك سابقة طولك وسنك...ماشى يا خفة يا طويل انت...

يقفل حازم مع نها ولكن تفضل حكايه صحاب نها البنات وخروجهم مع صحابهم وان صحابهم بيجيبو صحابهم معاهم دة مضايقاه من جواة لكن عموما ترجع كالعادة العلاقة بين حازم ونها اقوى من الاول وتفضل العملية ماشية كدة ويخلص رمضان على خير ويدخل العيد وتسافر نها القاهرة عند قرايبها ويسافر حازم مع صحابه اسبوع شرم الشيخ وياخدو الاتنين هدنة من بعض ومن قصة حبهم لحد ما فى شرم تحصل تطورات جديدة جدا ويقابل حازم شخصية غير متوقعة على الاطلاق...

ايه الشخصية ديه ده اللى هنعرفه المرة الجاية

الجزء الثلاثون:-

ويوصل حازم شرم مع صحابه حسام ورامى واحمد وينزلوا فى الفندق واول ما يوصلوا يغير حسام هدومه بسرعة ويقرر انه هينزل وكله هينزل معاه...يا عم انت فى ايه اهمد شوية مش لما نرتاح شوية نقعد نحط هدومنا...بقولكوا ايه احنا جايين شرم نرتاح وننام دى شرم وانتوا ما شفتوش البحر واحنا طالعين عامل ازاى وجامد اوى ازاى...يا ابنى انت اساسا مبتعرفش تجرى على رجلك يبقى هتعرف تعوم...مش لازم اعوم...ايوة انت تطفو ههههه...ماشى يا حازم ممكن تشتغلنى واحنا تحت بقى انا نازل يلا بقى مش هضيع وقت انا دة هو اسبوع...

يقوم رامى واحمد ويقولوا ما احنا عارفين هتفضل تزن تزن ولا هنرتاح و لا هنام شوية احنا ننزل معاك افيد وخلاص...عين العقل يا رجالة وانت يا روميو يلا معانا...لا انا هاخد دش واغير واكلمكوا وانا نازل اشوف انتو فين واجيلكوا...اه ما انت بقى يا حازم لازم تدى الالو وتدى التقرير انك وصلت وايه اللى حصل بالظبط دة انت مش بعيد توصف الطريق كان شكله ايه واحنا جايين...اه بقى انا لازم ادى التقرير عايز حاجة...لا يا عم ماشى بس متطولش يعنى يا اما والله هاجى احدفك بالطوب...طب امشى بقى وخد الباب فى ايدك هحصلكوا على طول...

ويتصل حازم بنها ويقولها انه وصل شرم...ايوة وصلت من ربع ساعة تقريبا اخبار القاهرة ايه...القاهرة عادى يعنى انت اللى المهم بقى اخبار شرم ايه ها طمنى...مفيش كويسة الجو جميل اوى...طب بقولك ياريت الجو بس اللى يكون جميل ها ما نبصش لحاجة تانية يعنى ونتلم...ملمومين حضرتك ما تقلقيش بعدين انا لسه ما نزلتش انا فى الاوضة فى الفندق لسه هاخد دش وابقى انزل للعيال...طيب المهم خد بالك من نفسك واستمتع واوعى تعمل حاجة تزعلنى...حاضر ما تقلقيش والله انتى عارفانى كويس...طبعا يا حازم ازاى تقول كدة عارفاك كويس وعشان كدة مش مطمنة....بقى كدة شكرا....ههههههه بهزر معاك والله يلا عشان اروح اقعد مع العيلة بقى مننساش نتلم اوكى...ماشى هتلم...

ياخد حازم الدش بتاعه ويغير هدومه وينزل وهو ماسك الموبيل بيتصل بصحابه عشان يعرف هما فين...ايوة يا ابنى انتو فين...ايوة بص احنا عند خليج نعمة تعالى عند اول الشط هتلاقينا قاعدين بس تعالى بسرعة احسن البحر جامد اوى ها...طيب يا فالح جايلكوا سلام...متتاخرش سلام...

ويروح حازم على المكان وهو ماشى يسمع حد بيبسبسله بسسسسسسسسسس....لكن حازم ما يبصش وراه ويقول لنفسه...ايدا يا جدعان هو فى اشتغالات هنا كمان ولا ايه...وتزيد البسبسة...ايه يا جدعان هو هنا فى تثبيت ولا ايه...وتتحول البسبسة لصوت بينده عليه.....يا حااااااااااازم.....لا حازم دة انا بقى بس مين دى اللى عارفانى هنا....ويبص حازم وراه ويلاقى ادامه حد غير متوقع خالص....

مين مريم...هاى حازم ازيك...تمام...اول ما شوفتك ما صدقتش والله...مصدقتيش انى اجى شرم ولا ايه...ههههههه لا مصدقتش ان انت يعنى عمالة اقول حد شبهك بس اتاكدت ان انت انت لما شفت وشك...بجد صدفة جامدة اوى انتى جاية اجازة...اه انا جاية 5 ايام مع بابا وماما وواحدة صاحبتى واختى...تمام انا بقى هقعد اكتر منك اسبوع بحالهم...ايوة يا عم محدش قدك...بس شكلك مختلف تماما هنا تصدقى شرم بتغير فعلا...يا سلام للاحسن ولا ايه...لا ولا ايه للاحسن طبعا...هههههه دى معاكسة بقى...لا والله عادى معاكسة ايه بس...ايه مش خايف اقول لنها مش انتو ارتبطو بردو دة انا زعلانة اوى مش تقولولى انكو ارتبطو انا مش هحسدكو يعنى...

لا والله يا مريم اصلها كانت على الضيق يعنى وجات بسرعة...هى ايه دى...الارتباط يعنى......ههههههههه ماشى لسه بردو خفيف...هنعمل ايه بقى لازم نضحك عشان الدنيا تمشى بعدين احنا فى شرم وكدة...اه لازم تمشى مع الجو صح...اه مش كدة..طيب هشوفك بقى اوكى انا هروح دلوقتى عشان اتاخرت عليهم وبعدين هكلمك اوكى اشوفك بالليل...خلاص اوكى...طب خد دى نمرتى الجديدة ...طيب تمام يلا سلام دلوقتى...سلام

صدفة غريبة اوى طبعا وغير متوقعة ولكن فى بال حازم عادى مكنش مهتم اوى لكن يمكن مكنتش صدفة بالنسبة للقدر وكان اللقاء دة مترتب عشان تحصل عليه حاجات كتير اوى بعد كدة...

ويرن موبيل حازم...ايوة يا حازم انت فين يا ابنى ساعة عشان تيجى...انا وصلت انتو اللى فين...لا احنا فى الفندق اصل حسام تعب وقال لازم ينام شوية مش قادر....والله واد اهبل مش دة اللى قال مش عايز اضيع وقت ومش جاى انام طيب انا جايلكو سلام...

» 62- قصة حقيقية حدثت بالظهران بالمملكة العربية السعودية
» خلفيات لسطح المكتب تشكيلة صور حقيقية مع فوتوشوب
» باربى حقيقية :: فتاة أوكرانية تتحول إلى «باربي» بالصور (86 صورة بجودة عالية)